„Þetta er alltaf jafn sætt alveg sama hvað maður upplifir þetta oft,“ sagði hin þrautreynda handknattleikskona Vals, Hildigunnur Einarsdóttir, við handbolta.is í kvöld eftir að hún hafði tekið við Íslandsbikarnum annað árið í röð með samherjum sínum.
„Við verðskulduðum svo að vinna titilinn. Þetta er þvílíkt flott lið og það besta í deildinni í vetur. Við höfum sannarlega unnið fyrir sigrunum,“ sagði Hildigunnur en Valur vann 29 af 30 leikjum á keppnistímabilinu svo vart verður um það deilt að Íslandsbikarinn verður geymdur á réttum stað að loknu þessu tímabili.
Engan bilbug er að finna á Hildigunni. Hún ætlar sér ótrauð að halda áfram með Val á næsta tímabili. „Ég hef ekki skrifað undir eitt eða neitt ennþá og hvort af því verður kemur vonandi í ljós fljótlega,“ sagði Hildigunnur sposk á svip og bætti við:
Stefnir á EM með landsliðinu
„Ég kann ekki að hætta, þar að auki er svo gaman að þessu. Meðan ég get samræmt handboltann og vinnuna þá langar mig að halda áfram með Val og reyna um leið að fara með landsliðinu á EM í desember,“ sagði Hildigunnur Einardóttir hin þrautreynda handknattleikskona og Íslandsmeistari annað árið í röð með Val.
Sjá einnig:
Um er að ræða einstakt afrek – við spilum frábæran handbolta
Ég er svekkt í kvöld – stolt af okkur
Olís kvenna: Úrslitakeppni, leikjadagskrá
Valur Íslandsmeistari 2024 – annað árið í röð – vann 29 af 30 leikjum
Heldur ótrauð áfram næsta árið – alltaf jafn sætt að vinna