Oddur Gretarsson og samherjar hans í Balingen Weilstetten unnu í kvöld sinn annan leik í röð í þýsku 1. deildinni í handknattleik. Og það sem meira er, annan leikinn í röð á útivelli þegar þeir lögðu Erlangen, 34:32. Oddur átti mjög góðan leik og skoraði níu mörk, þrjú úr vítaköstum, og var markahæstur í liðinu ásamt Vladan Lipovina.
Erlangen var fjórum mörkum yfir í hálfleik, 16:12. Balingen er þar með komið í 16. sæti af 20 liðum með fjögur stig eftir átta leiki. Liðið tapaði sex fyrstu viðureignum sínum í deildinni í haust og í vetur.
Öruggt hjá Janusi og félögum
Göppingen með Janus Daða Smárason innborðs unnu öruggan sigur í heimsókn sinni til Nordhorn, 29:20. Göppingen var með yfirburði í leiknum frá upphafi til enda og hafði m.a. sex marka forskot að loknum fyrri hálfleik, 15:9. Janus Daði skoraði tvö mörk í jafn mörgum skotum.
Smit hjá Magdeburg
Til stóð að Magdeburg, lið Gísla Þorgeirs Kristjánssonar og Ómars Inga Magnússonar, tæki á móti Tusem Essen í kvöld. Leiknum var frestað í morgun eftir að einn úr leikmannahópi Magdeburg greindist jákvæður við skimun við kórónuveiru í gær.
Skoruðu aðeins 11 mörk!
Þriðja viðureign kvöldsins í þýsku deildinni var á milli Wetzlar og Ludwigshafen. Úrslit leiksins voru ótrúlega því leikmenn Ludwigshafen skoruðu aðeins 11 mörk gegn 29 mörkum leikmanna Wetzlar. Leikmenn Ludwigshafen virtust miður sín í leiknum. Þeir skoruðu aðeins eitt mark á síðustu 12 mínútum leiksins.
Staðan:
Rhein-Neckar Löwen 14(8), Kiel 12(7), Stuttgart 11(8), Flensburg 10(6), Wetzlar 10(8), Melsungen 9(6), Erlangen 9(9), Göppingen 8(6), Magdeburg 8(7), Lemgo 8(8), Leipzig 7/6), Füchse Berlin 7(6), Bergischer 7(7), Hannover-Burgdorf 6(7), Nordhorn 6(9), Balingen 4(8), Minden 3(6), Ludwighafen 3(9), Essen 2(6), Coburg 0(7).
