Benedikt Gunnar Óskarsson skoraði fjögur mörk, tvö þeirra úr vítaköstum, þegar Kolstad vann Nærbø, 30:27, á heimavelli í 5. umferð í norsku úrvalsdeildinni í handknattleik í kvöld. Sigurjón Guðmundsson tók þátt í öðrum leik sínum í röð með Kolstad liðinu að þessu sinni og Sveinn Jóhannsson var einnig með öðru sinni eftir meiðsli. Sveinn skoraði eitt mark.
Sigvaldi Björn Guðjónsson var ekki með Kolstad-liðinu að þessu sinni. Væntanlega fengið að kasta mæðinni eftir mikið álag upp á síðkastið.
Sigurjón markvörður, sem kallaður var inn í hópinn hjá Kolstad um síðustu helgi þegar Torbjørn Bergerud meiddist, var í nokkra stund í marki liðsins í leiknum í dag. HK-ingurinn fyrrverandi varði þrjú skot af átta sem hann fékk á sig.
Tap eftir sigur á föstudaginn
Dagur Gautason og liðsmenn ØIF Arendal töpuðu á heimavelli fyrir Bækkelaget á heimavelli, Sør Amfi, 27:23. Dagur skoraði fjögur mörk, ekkert úr vítakasti.
Leikmenn Bækkelaget hefndu þar með fyrir tapið á sama stað í 16-liða úrslitum bikarkeppninnar á síðasta föstudag.
ØIF Arendal er í áttunda sæti með fjögur stig eftir fimm umferðir. Stöðuna í norsku úrvalsdeildinni og í fleiri deildum í evrópskum handknattleiksdeildum er að finna hér.
