„Frammistaðan var mjög góð fyrir utan stuttan kafla í fyrri hálfleik þar sem við misstum hausinn. Sigurinn var verðskuldaður,“ sagði Gunnar Magnússon þjálfari Aftureldingar eftir sigur á Val í fjórða leik liðanna í undanúrslitum Olísdeildar karla í handknattleik að Varmá í kvöld, 29:26. Hvort lið hefur þar með unnið tvisvar sinnum og því er framundan oddaleikur um sæti í úrslitum á heimavelli Vals á föstudagskvöld.
„Eftir þvælukafla í fyrri hálfleik þá fóru menn í agann og skipulagið á nýjan leik. Eftir það litum við aldrei um öxl,“ sagði Gunnar sem hlakkar til oddaleiksins á föstudaginn.
Allt er þegar þrennt er
„Ég fann pressuna í dag um að við yrðum að fá fyrsta oddaleikinn í úrslitakeppninni. Það er frábært fyrir þessi tvö frábæru lið að fá oddaleik í lokin á stórkostlegu einvígi. Auk þess er það frábært fyrir handboltann að fá oddaleik. Ég á ekki von á öðru en að það verði stappaði í Valsheimilinu og mikil veisla sem boðið verður upp á. Okkur langar í meira. Við höfum reynt að vinna tvisvar á heimavelli Vals. Eigum við að segja að allt er þegar þrennt er. Nú ætlum við að landa sigri,“ sagði Gunnar Magnússon þjálfari Aftureldingar í samtali við handbolta.is í kvöld.
Lengra viðtal við Gunnar er að finna í myndskeiði hér fyrir ofan.
Olís karla: Leikjadagskrá, úrslitakeppni
Oddaleikur á Hlíðarenda á föstudagskvöld
Fleiri þurfa að eiga toppleik til að við vinnum Aftureldingu
