- Auglýsing -
- Óðinn Þór Ríkharðsson fór á kostum og skoraði níu mörk í níu skotum í níu marka sigri Kadetten Schaffhausen, 32:23, á Wacker Thun í þriðja og síðasta leik liðanna í átta liða úrslitum úrslitakeppni svissnesku A-deildarinnar í handknattleik í gær. Óðinn Þór skoraði tvö marka sinna úr vítaköstum.
- Kadetten er þar með komið í undanúrslit eins og HC Kriens-Luzern og BSV Bern. Amicitia Zürich og Surh Arau þurfa a.m.k. einn leik í viðbót til þess að ljúka rimmu sinni.
- Tumi Steinn Rúnarsson lék afar vel fyrir Alpla Hard í gær þegar liðið vann Bregenz í grannaslag, 38:37, í síðustu umferð austurrísku 1. deildarinnar í handknattleik í gær. Tumi Steinn skoraði átta mörk og gaf sex stoðsendingar. Nokkuð er liðið síðan að Alpla Hard varð deildarmeistari undir stjórn Hannesar Jóns Jónssonar þjálfara.
- Alpla Hard mætir Bregenz í átta liða úrslitum þegar úrslitakeppnin hefst á næstu dögum.
- Ísak Steinsson markvörður landsliðsins og liðsfélagar í Drammen HK eru úr leik í úrslitakeppninni í Noregi eftir tap fyrir Elverum, 35:31, í Drammen í gær í öðrum leik liðanna í átta liða úrslitum. Ísak var drjúgan hluta leiksins í marki Drammen og varði átta skot, þar af eitt vítakast, 25%.
- Wisla Plock vann Azoty-Puławy, 40:25, í undanúrslitum pólsku bikarkeppninnar í handknattleik í gær. Viktor Gísli Hallgrímsson var ekki í leikmannahópi Wisla Plock í leiknum í gær.
- Í dag mætir Wisla Plock liði Industria Kielce í úrslitaleik bikarkeppninnar. Industria Kielce vann Mielec, 36:23, í hinni viðureign undanúrslita í gær. Reikna má fastlega með að Viktor Gísli taki þátt í úrslitaleiknum.
- Auglýsing -
