Jakob Lárusson þjálfari kvennaliðs FH í Olísdeildinni hefur sagt upp starfi sínu frá og með deginum í dag. Þetta kemur fram í tilkynningu á Facebook-síðu handknattleiksdeildar FH í kvöld.
Jakob hóf störf hjá FH sumrið 2019 og kom FH liðinu upp í Olísdeildina á sínu fyrsta ári.
„Það hefur verið mikill heiður fyrir mig að starfa fyrir FH. Ég tel á þessum tímapunkti best fyrir liðið að annar þjálfari klári tímabilið og haldi áfram uppbyggingu liðsins. Ég vil þakka leikmönnum, stjórn, stuðningsmönnum og öllum FH-ingum kærlega fyrir samstarfið og óska þeim alls hins besta segir Jakob Lárusson fráfarandi þjálfari meistaraflokks kvenna hjá FH í tilkynningu deildarinnar. Handknattleiksdeild FH þakkar Jakobi góð störf fyrir félagið og óskar honum velfarnaðar í þeim störfum sem hann mun taka sér fyrir hendur í framtíðinni.
Ekki er ljóst á þessari stundu hver tekur við þjálfun FH-liðsins af Jakobi en verið er að leita að eftirmanni hans.
FH rekur lestina í deildinni án stiga eftir sex leiki. Næsti leikur FH verður á móti ÍBV í Kaplakrika á laugardaginn.
