Hinn þrautreyndi handknattleiksþjálfari Andrés Gunnlaugsson virðist hafa bæst í þjálfarateymi kvennaliðs Aftureldingar í handknattleik. Andrés var á hliðarlínunni hjá Aftureldingu síðdegis í dag þegar Aftureldingarliðið mætti Fjölni í æfingaleik að Varmá og virðist þess albúinn að starfa við hlið Arnar Bjarkasonar við þjálfun kvennaliðs Aftureldingar á komandi leiktíð í Grill 66-deildinni. Örn var samstarfsmaður Jóns Brynjars Björnssonar við þjálfun Aftureldingarliðsins á síðustu leiktíð.
Forsvarsmenn Aftureldingar hafa horft í kringum sig síðustu vikur eftir að Jón Brynjar Björnsson þjálfari óskaði eftir að verða leystur undan störfum. Jón Brynjar er að flytja til Svíþjóðar vegna framhaldsnáms unnustu hans. Hann er ennþá á landinu og sat á varamannabekknum í leiknum við Fjölni.
Andrés er reyndur þjálfari sem víða hefur þjálfað á löngum ferli. Síðast var hann með kvennalið Berserkja og Víkings.
