Miðjumaðurinn sterki, Sveinn Andri Sveinsson, verður ekki með Aftureldingu það sem eftir er þessa keppnistímabils hvenær sem það hefst á ný og hversu lengi sem það mun standa. „Sveinn Andri er úr leik á þessu keppnistímabili með okkur,“ sagði Gunnar Magnússon, þjálfari Aftureldingar, við handbolta.is í morgun.
Sveinn Andri gekkst í gær undir aðgerð á krossbandi í hné en það hefur verið „óvirkt“ sem kallað er um nokkurt skeið. Hann gat þó tekið þátt í leikjum Aftureldingar í september en þegar til lengri tíma er litið var ekki skynsamlegt að halda áfram á sömu braut, að sögn Gunnars.
„Það var ákveðið að fara í aðgerðina núna útaf ástandinu almennt. Til framtíðar litið fyrir Svein Andra og hans feril þá var nauðsynlegt að laga krossbandið fyrr en síðar. Úr því að svo er þá var ekkert verra að gera það núna því maður veit ekki hvernig næstu vikur og mánuðir þróast,“ sagði Gunnar sem ætlar ekki að sækja styrkingu út fyrir raðir Aftureldingar.
„Við ætlum að fylla í skarðið með okkar ungu leikmönnum, láta þá spreyta sig,“ sagði Gunnar ennfremur.
Afturelding hefur þar með tvo leikmenn í langtímameiðslum. Auk Sveins þá er Birkir Benediktsson í endurhæfingu eftir aðgerð í kjölfar hásinarslits í september. „Birkir er á áætlun og gengur vel,“ sagði Gunnar.
Eins og önnur lið í Olísdeildunum þá hóf Afturelding æfingar innanhúss á fimmtudag. Gunnar sagði ástand leikmanna vera „þokkalegt og svipað og von hafi verið á“ eftir að innanhússæfingar hafa meira og minna legið niðri frá því í byrjun október.
