„Þetta er bara ótrúlega spennandi leikir að mínu mati. Ég er jákvæð og bjartsýn,“ sagði Andrea Jacobsen landsliðskona og leikmaður EH Aalborg um væntanlega leiki við Ungverja í umspili fyrir HM kvenna í handknattleik sem standa fyrir dyrum. Fyrri leikurinn verður á morgun, laugardag, á Ásvöllum. Aðgangur er ókeypis í boði Icelandair. Flautað verður til leiks klukkan 16.
„Ég er alveg viss um að við getum náð hagstæðum úrslitum heima í fyrri leiknum og þannig sett pressu á þær fyrir síðari leikinn í Ungverjalandi. Flestir leikmenn ungverska liðsins leika með félagsliðum í heimalandinu. Hér er á ferðinni mjög gott tækifæri fyrir okkur til að máta okkur við sterkt lið sem hefur verið í lokakeppni stórmóta undanfarin ár. Við mætum fullar sjálfstrausts til leiks og sýnum hvers við erum megnugar,“ sagði Andrea Jacobsen landsliðskona í handknattleik í samtali við handbolta.is.
Landsliðið valið fyrir leikina mikilvægu við Ungverja
Ungverska landsliðið kom til landsins í gær og æfði á Ásvöllum síðdegis og æfir á ný á sama stað í dag. Eins æfir íslenska landsliðið á Ásvöllum í dag en liðið hefur verið saman við æfingar á höfuðborgarsvæðinu síðan á mánduaginn.
Vaskur hópur fylgir Ungverjum til Íslands
Síðari viðureign Íslands og Ungverjalands fer fram í Érd, skammt frá Búdapest, á miðvikudaginn. Samanlagður sigurvegari beggja liða tryggir sér keppnisrétt á HM sem fram fer í desember í Danmörku, Noregi og Svíþjóð.
Ókeypis aðgangur er á leikinn klukkan 16 á Ásvöllum á laugardaginn í boði Icelandair. Það er tekið fram hér þótt auglýsingastofan sem vinnur fyrir Icelandair hafi ekki minnsta áhuga á að kaupa auglýsingu af handbolti.is né séð sér fært að láta svo lítið að svara óskum þar um.
