Í mörg horn verður að líta hjá áhugafólki um handknattleik í kvöld þegar fjórir leikir fara fram í úrslitakeppni og umspili Olísdeilda kvenna og karla. Fyrsti leikurinn hefst klukkan 17.45 en sá síðasti tveimur og hálfri stund síðar. Úrslit leikjanna geta orðið á þann veg að fjögur einvígi verði leidd til lykta
Oddaleikur á Hlíðarenda
Oddaleikur Vals og Aftureldingar í undanúrslitum Olísdeildar karla er síðastur á dagskrá en víst er að augu margra verða á þeirri viðureign. Hvort lið hefur tvo vinninga. Sigurliðið leiksins mætir Fram í úrslitum um Íslandsmeistaratitilinn. Valur vann fyrstu viðureignina, 35:33, eftir framlengingu. Afturelding svaraði með átta marka sigri að Varmá, 31:23. Þar á eftir tók við naumur sigur Vals, 30:29. Mosfellingar jöfnuðu metin á heimavelli á mánudaginn, 29:26.
Valur í vænlegri stöðu
Reiknað er með að fólk fjölmenni á leikinn í N1-höllinni og að hafa þurfi vaðið fyrir neðan sig og mæta snemma og fylgjast með viðureign Vals og ÍR í undanúrslitum Olísdeildar kvenna, þriðja úrslitaleiknum, sem hefst klukkan 18. Valur getur bundið enda á rimmuna með sigri á ÍR.
Fram þarf á sigri á halda
Fram fær Hauka í heimsókn í Lambhagahöllina í þriðja leik liðanna í undanúrslitum Olísdeildar kvenna klukkan 19.30. Fram má ekki við tapi í kvöld eftir tvo sigurleiki Hauka.
Byrjað verður að Varmá
Fyrsti leikurinn á dagskrá kvöldsins verður viðureign Aftureldingar og Stjörnunnar í umspili Olísdeildar kvenna. Flautað verður til leiks klukkan 17.45 að Varmá. Stjarnan hefur tvo vinninga en Afturelding einn. Heimaliðið þarf á sigri að halda til að ná í oddaleik í Hekluhöllinni á mánudagskvöld. Vinni Stjarnan heldur hún sæti sínu í Olísdeildinni en Afturelding verður áfram í Grill 66-deildinni.
Leikir kvöldsins
Umspil Olísdeildar kvenna, úrslit, fjórði leikur:
Varmá: Afturelding – Stjarnan (1:2), kl. 17.45.
Olísdeild kvenna, undanúrslit, þriðju leikir:
N1-höllin: Valur – ÍR (2:0), kl. 18.
Lambhagahöllin: Fram – Haukar (0:2), kl. 19.30.
Olísdeild karla, undanúrslit, oddaleikur:
N1-höllin: Valur – Afturelding (2:2), kl. 20.15.
- Allir leikir kvöldsins verða sendir út á Handboltapassanum.
- Miðasala á alla leikina fer fram á stubb.is.
