Landsliðsmaðurinn Elvar Örn Jónsson er vongóður í samtali við Vísir í dag um að hafa náð fullri heilsu og geta leikið af fullum krafti með íslenska landsliðinu í handknattleik á Evrópumeistaramótinu í Þýskalandi í næsta mánuði.
Selfyssingurinn hefur sjaldan ef nokkurn tímann leikið betur á ferlinum en á yfirstandandi leiktíð með liði sínu MT Melsungen.
Hann hefur ekki tekið þátt í þremur síðustu leikjum Melsungen en síðast í gær vann liðið Leipzig, 26:21, á útivelli í 16-liða úrslitum þýsku bikarkeppninnar.
Elvar Örn tognaði á kviðvöðva í blálokin á viðureign MT Melsungen og Eisenach 24. nóvember og hefur síðan mátt halda sér til hlés. „Það er voða lítið sem maður getur gert til að flýta batanum,” segir Elvar Örn í samtali við Vísir. Hann telur næsta víst að hann taki ekki þátt í fleiri leikjum með Melsungen á árinu enda er óðum að styttast í að hlé verður gert á deildarkeppninni fram í febrúar.
„Þetta tekur kannski 2-3 vikur í viðbót til að lagast,” segir Elvar Örn Jónsson landsliðsmaður í handknattleik og leikmaður þýska 1. deildarliðsins MT Melsungen í samtali við Vísir í morgun.
Melsungen á þrjá leiki eftir í deildinni, sá síðasti verður 22. desember við Hannover-Burgdorf. Um þessar mundir er Melsungen í fjórða sæti deildarinn, þremur stigum á eftir Magdeburg og Füchse Berlin.
