U17 ára landslið Íslands í handknattleik kvenna leikur næst við landslið Sviss á þriðjudaginn í milliriðlakeppni um sæti níu til sextán á Evrópumótinu í Podgorica í Svartfjallalandi. Leikurinn hefst klukkan 13.45, eftir því sem næst verður komist.
Daginn eftir, á miðvikudag, mætast landslið Íslands og Svíþjóðar í fyrrgreindri milliriðlakeppni. Þá stendur til að flauta til leiks klukkan 11.30. Báðir leiktímar miðast við klukkuna á Íslandi.
Sviss og Tékkland taka með sér tvö stig hvort í milliriðilinn. Ísland og Svíþjóð hefur keppni án stiga.
Í hinum riðlinum í keppninni um sæti níu til sextán eiga sæti landslið Rúmeníu, Noregs, Portúgals og Norður Makedóníu.
Eftir milliriðlakeppnina á miðvikudagskvöld verður frídagur frá kappleikjum á fimmtudaginn áður en önnur tveggja daga dagskrá tekur við. Leikið verður í kross á milli riðla á föstudaginn og um sæti á laugardaginn.
Fjórir leikir eru þar með eftir hjá íslensku stúlkunum. Þremur er lokið.
Leikjadagskrá milliriðla og staðan verður birt á handbolti.is í fyrramálið.
