Víkingur og ungmennalið Fram skildu með skiptan hlut í lokaleik 7. umferðar Grill 66-deildar kvenna í handknattleik í Úlfarsárdal síðdegis. Lokatölur, 29:29, eftir að Víkingur var þremur mörkum framar þegar fyrri hálfleik var lokið, 16:13.
Ingunn María Brynjarsdóttir markvörður Fram varði síðasta markskot Víkinga á síðustu sekúndum, eitt af 17 skotum sínum í leiknum. Nokkru áður hafði Íris Anna Gísladóttir skorað jöfnunarmark Framara.
Víkingur er þar með kominn upp í þriðja sæti deildarinnar með níu stig. Ungmennin úr Fram eru með jafn mörg stig. FH situr þar með í fimmta sæti með átta stig eftir að hafa tapað fyrir ungmennaliði Hauka í gær á Ásvöllum. Selfoss er efst með 14 stig og Grótta fylgir fast á eftir með 12 stig í sarpinum.
Fram var með tveggja marka forskot, 28:26, þegar fimm mínútur voru til leiksloka. Víkingar tóku leikhlé í þeirri stöðu og tókst að jafna í kjölfarið og nærri því að vinna.
Staðan og næstu leikir í Grill 66-deildum.
Mörk Fram U.: Dagmar Guðrún Pálsdóttir 8, Sóldís Rós Ragnarsdóttir 6, Valgerður Arnalds 6, Íris Anna Gísladóttir 5, Sara Rún Gísladóttir 3, Elín Ása Bjarnadóttir 1.
Varin skot: Ingunn María Brynjarsdóttir 17.
Mörk Víkings: Ída Bjarklind Magnúsdóttir 7, Auður Brynja Sölvadóttir 4, Díana Ágústsdóttir 4, Hafdís Shizuka Iura 4, Mattý Rós Birgisdóttir 4, Áróra Eir Pálsdóttir 3, Katrín Hallgrímsdóttir 2, Sunna Katrín Hreinsdóttir 1.
Varin skot: Tara Sól Úranusdóttir 10, Signý Pála Pálsdóttir 4.
