Janus Daði Smárason og Sigvaldi Björn Guðjónsson urðu í dag norskir bikarmeistarar í handknattleik þegar lið þeirra Kolstad vann Elverum í úrslitaleik í keppnishöllinni í Arendal, 34:27.
Þetta er um leið í fyrsta sinn sem Kolstad vinnur bikarkeppnina. Elverum var ríkjandi bikarmeistari.
Janus Daði og Sigvaldi Björn voru markahæstir hjá Þrándheimsliðinu ásamt Simen Ulstad Lyse. Hver þeirra skoraði sjö sinnum.
Orri Freyr Þorkelsson lék vel fyrir Elverum og skoraði m.a. þrjú mörk.
Sigvaldi Björn sá til þess að Kolstad var með þriggja marka forskot þegar hann skoraði 16. markið rétt áður en leiktíminn var úti, 16:13.
Kolstad var mun sterkara í síðari hálfleik og náði ítrekað sjö marka forskoti, 27:20, og 30:23, svo dæmi sé tekið.
Kolstad Håndball win their first title ever – the Norwegian Cup.#handball pic.twitter.com/V0gapCgNMK
— Rasmus Boysen (@RasmusBoysen92) February 26, 2023
