Jón Halldórsson formaður handknattleiksdeildar Vals var í dag kjörinn formaður Handknattleikssambands Íslands til næstu tveggja ára. Hann er fimmtándi formaður HSÍ frá því að sambandið var stofnað 1957. Jón tekur við af Guðmundi B. Ólafssyni sem verið hefur formaður frá 2013 og í stjórn frá árinu 2009.
Ásgeir lagði Kristinn
Ásgeir Jónsson var kjörinn varaformaður án mótframboðs. Ásgeir Sveinsson var kjörinn formaður landsliðsnefndar karla. Hann hafði betur í kosningu gegn Kristni Björgúlfssyni með 32 atkvæðum gegn átta.
Inga Lilja Lárusdóttir, var endurkjörin formaður fræðslu- og útbreiðslunefndar og Bjarni Ákason formaður markaðsnefndar.
Haddur Júlíus Stefánsson, Harpa Vífilsdóttir og Helga Birna Brynjólfsdóttir voru kosin í varastjórn til eins árs í stað Alfreðs Finnssonar, Kristjáns Gauks Kristjánssonar og Ragnars Lárusar Kristjánssonar.
Sigurborg Kristinsdóttir, gjaldkeri HSÍ, Guðríður Guðjónsdóttir, formaður landsliðsnefndar kvenna, Kristín Þórðardóttir, formaður mótanefndar HSÍ, Ólafur Örn Haraldsson, formaður dómaranefndar HSÍ, voru kjörin til tveggja ára á þingi HSÍ fyrir ári.
Þingið var átakalaust og aðeins einn tók til máls undir liðnum önnur mál. Nokkrar orðalagsbreytingar voru samþykktar á lögum sambandsins.
Júlíus Hafstein heiðursformaður HSÍ afhenti Guðmundi B. Ólafssyni gullkross HSÍ á þinginu.
Einnig afhentu fulltrúar frá ÍSÍ Guðmundi heiðurskross ÍSÍ.
HSÍ var rekið með 43 milljóna tapi í fyrra – búist við afgangi 2025
Kosið verður um eitt sæti í stjórn HSÍ
