Lyfjaeftirlit þýska íþróttasambandsins ákveður í næstu viku hvort það taki upp mál svissneska markvarðarins Nikola Portner og leikmanns þýska meistaraliðsins SC Magdeburg. Í lok síðasta mánaðar vísaði lyfjanefnd þýska handknattleikssambandsins málinu frá og ákvað að úrskurða Portner ekki í leikbann. Hann féll á lyfjaprófi í vor eftir að merki um notkun á methamphetamine fannst í sýni sem Portner skilaði af sér.
Eftir niðurstöðu lyfjanefndar þýska handknattleikssambandsins vonaðist Portner og félag hans eftir að málinu væri lokið. Eftir því sem þýskir fjölmiðar greina frá er ekki svo.
Talsmaður lyfjaeftirlits þýska íþróttasambandsins segir að nefndin taki mál Portners fyrir í næstu viku og ætli í kjölfarið að greina frá viðbrögðum sínum við niðurstöðu lyfjanefndar þýska handknattleikssambandsins og hvort málið verði tekið upp á vegum eftirlitsins.
Portner hefur haldið fram sakleysi sínu frá fyrsta degi og m.a. talið mögulegt að hann hafi komist í snertingu við methamphetamine hjá einhverjum sem hann umgekkst. Að einhverju leyti virtist lyfjanefnd þýska handknattleikssambandsins hafa fallist á það í niðurstöðu sinni í síðustu viku.
Portner hefur verið í æfinga- og keppnisbanni síðan niðurstaða lyfjaprófsins lá fyrir snemma í apríl.
