- Auglýsing -
- Nú er lag fyrir vinnufúsar hendur dugnaðarfólks að láta til sín taka. Hinn 5. apríl verður ársþing Handknattleikssambands Íslands haldið. Kjörtímabili fimm stjórnarmanna rennur þá út og um að gera að einhverjir þeirra sem telja að eitt og annað megi fara betur hjá HSÍ gefi kost á sér.
Nú er sannarlega lag til að standa upp úr stólnum, hafa áhrif, koma skoðunum sínum á framfæri, láti verkin tala í stað þess að sitja á góðum hugmyndum og viðra þær aðeins yfir kaffibolla með vinum eða í viðtölum í fjölmiðlum. - Nú er tækifærið, að hrökka eða stökkva. Víst er að úti á akrinum er margt fólk af öllum kynjum sem veit hvað betur má fara. Nú er tími þeirra runninn upp til bretta upp ermar, snúa vörn í sókn. Tími athafna í stað orða er runninn upp.
- Fyrrverandi landsliðsmenn og -konur, landsliðsþjálfarar, fólk með yfirburðaþekkingu á íþróttinni, eða þrautreynt rekstrarfólk sem veit hvernig gera má gott betra. Hvar sjóði er að finna til rekstursins og hvar má betur gera í núverandi rekstri. Ekki má gleyma þjálfurunum sem vita hvar skórinn kreppir.
- Lífsvant fólk sem á auðvelt með að koma skoðunum sínum skýrt á framfæri og hrífa fólk með sér í leik og starfi.
- Fólk sem þegar hefur brotið niður múra til þess að ná árangri og segir nei ekki vera neitt svar.
- Fólk með nægan tíma til þess að leggjast árarnar í frítímanum eða fá stöku sinnum að syndga upp á náðina hjá vinnuveitendum til að sinna þakklátu sjálfboðaliðastarfi. Jafnvel þótt vel kunni að takast til.
- Svo ekki sé talað um fólk sem veit hvernig betur megi hlúa að íþróttinni, hvernig sambandið eigi og megi styrkja uppeldi og þjálfun handknattleiksfólks svo að einn daginn vinnum við loksins gullið, ekki bara inni á vellinum heldur einnig utan vallar.
- Síðan er það blessað markaðsstarfið að ógleymdri treyjusölunni sem snertir strengi þjóðarinnar engu síður en landsliðin.
- Tveir karlmenn hafa þegar gefið kost á sér. Karlar sem þekkja vel til innan hreyfingarinnar og hafa uppi hugmyndir, vilja, dug og löngun til að láta til sín taka. Þeir hafa sett fram sínar hugmyndir, vilja bera með sér ferskan blæ breytinga.
- Fleiri hendur þarf á dekk. Tveir menn duga ekki þótt hamhleypur séu og með góðan vilja til góðra verka. Eða hver vill sjá rússneska kosningu hjá íþróttasambandi sem hefur innan sinna raða allar þær hugmyndir sem talað er um vítt og breitt innan hennar?
- Já, nú er lagt til að láta til sín taka. Láta verkin tala. Jafngott tækifæri gefst ekki fyrr en í fyrsta lagi eftir ár og jafnvel tvö.
Ívar Benediktsson, [email protected]
- Auglýsing -
