„Ég var staðráðinn í að gera eitthvað til að hjálpa liðinu þegar tækifæri mitt gafst,“ sagði Haukur Þrastarson sem kom eins ferskur blær inn í sóknarleik íslenska landsliðsins í síðari hálfleik viðureignarinnar við Frakka í gær á Evrópumótinu í handknattleik karla.
„Við vorum alltaf í eltingleik að þessu sinni. Náðum þeim aldrei. Tapið var svekkjandi en við megum ekki dvelja við það, heldur taka okkur saman og klára leikina tvo sem eftir eru og vinna þá báða. Þeiru eru mjög mikilvægur. Möguleikarnir eru enn fyrir hendi. Sigur er það eina sem kemur til greina,“ sagði Haukur Þrastarson ennfremur ákveðinn á svip.
Haukur skoraði þrjú mörk í leiknum við Frakka og átti auk þess stoðsendingar á félaga sína sem skiluðu árangri.
Ennþá er miði möguleiki
Viðureign Íslands og Króatíu á EM karla fer fram á morgun, mánudag, og hefst klukkan 14.30. Enn á íslenska landsliðið möguleika á að tryggja sér sæti í forkeppni Ólympíuleikanna. Til þess þarf allt að ganga upp eins Þorkell Gunnar Sigurbjörnsson fréttamaður RÚV rammaði skilmerkilega inn á X.
Ef Ísland ætlar í Ólympíuforkeppnina þarf margt núna að ganga upp.
— Þorkell Gunnar Sigurbjörnsson (@thorkellg) January 20, 2024
1) Ísland þarf að vinna Króatíu og Austurríki.
2) Austurríki þarf að tapa fyrir Frakklandi og Íslandi.
3) Holland má helst ekki fá fleiri en 3 stig.
4) Egyptaland þarf að verða Afríkumeistari.
