„Það var frábær endir á mótinu að vinna frábært norskt lið,“ segir Einar Andri Einarsson annar þjálfara U20 ára landsliðs karla í handknattleik eftir að það tryggði sér 7. sætið á Evrópumótinu í Slóveníu í dag með þriggja marka sigri á Noregi, 32:29. Þar með jafnaði íslenska landsliðið sinn besta árangur á EM í þessum aldursflokki frá árinu 2018. Um leið gefur sigurinn auk árangurs 21 árs landsliðsins á HM í fyrra Íslandi að öllum líkindum sæti í efsta styrkleikaflokki þegar dregið verður í riðla HM 21 árs landsliða sem hefst í Póllandi eftir 11 mánuði. Dregið verður í riðla snemma á næsta ári.
„Við lögðum ríka áherslu á það við strákana fyrir leikinn að enda mótið með sigri, taka sigurtilfinninguna með sér heim. Sigurinn gaf öllum í liðinu og í kringum það mjög mikið,“ segir Einar Andri ennfremur.
„Strákarnir héldu haus og aga út leikinn þrátt fyrir áhlaup norska liðsins,“ segir Einar Andri sem leggur áherslu á hversu öflugur hópurinn er. Hver og einn er tilbúinn að koma inn og leggja sig fullkomlega fram, hvert sem hlutverk þeirra er.
Einar Andri segir að sjöunda sætið geti riðið baggamuninn þegar dregið verður í riðla heimsmeistaramóts 21 árs landsliða á næsta ári. „Allt er þetta talið þegar dæmið er gert upp. Það verður mjög spennandi að sjá hvað kemur í ljós áður en dregið verður í riðla HM.“
Ennfremur segir Einar Andri að árangurinn gefi strákunum skýrt merki um að þeir séu hluti af einu besta handknattleiksliði heims. „Frammistaðan á að gefa mönnum aukið sjálfstraust. Framtíðin er björt í íslenskum handbolta,“ segir Einar Andri Einarsson sem þjálfar U20 ára landslið karla í handknattleik ásamt Halldóri Jóhanni Sigfússyni.
Lengra viðtal við Einar Andra er efst í þessari frétt.
EMU20 karla: Leikir, úrslit og staðan, milliriðlar og sætisleikir
Enduðu EM á sigri – 7. sætið – Breki skellti í lás á afmælisdaginn
