Elín Jóna Þorsteinsdóttir landsliðsmarkvörður og leikmaður Aarhus Håndbold fær nýjan þjálfara til liðsins á næstu vikum. Jeppe Vestergaard Kristensen sem stýrði liðinu í vetur var gert að taka pokann sinn eftir að liðið féll úr dönsku úrvalsdeildinni eftir tap í lokaumferðinni.
Stjórn félagsins tók þá ákvörðun að segja þjálfaranum upp á stjórnarfundi á dögunum. Nýr þjálfari fær það eina markmið að endurheimta sæti í úrvalsdeildinni strax að ári liðnu.
Árangurinn á leiktíðinni var skiljanlega langt undir væntingum enda stefnan tekin á að vera í hópi átta efstu liðanna og taka þátt í úrslitakeppninni. Það gekk svo sannarlega ekki eftir.
Þrautarganga
Illa hefur gengið að koma á fót öflugu kvennaliði í Árósum á undanförnum 20 árum. Blásið var til sóknar þegar Aarhus United varð til fyrir nærri áratug. Sú sókn hefur ekki gengið sem skildi. Fjárhagurinn hefur lengi verið slæmur og árangurinn undir væntingum auk fleiri atriða.
Elín Jóna gekk til liðs við Aarhus Håndbold síðasta sumar frá EH Aalborg.
