Eyjamenn komast ekki til Ísafjarðar

Ekkert verður af því að keppni hefjist í Olísdeild karla í dag eins og til stóð. Viðureign Harðar og ÍBV sem vonir voru bundnar við að færi fram og hæfist í íþróttahúsinu á Torfnesi klukkan 15 í dag hefur verið frestað. Í tilkynningu frá mótanefnd HSÍ segir að ekki sé fært með flugi til Ísafjarðar.

Nýr leiktími verður ákveðinn síðar. Upphaflega átti leikur Harðar og ÍBV að fara fram í byrjun desember en var slegið á frest vegna þátttöku ÍBV í Evrópubikarkeppninni.

Flest bendir til þess að fyrsti leikur ársins í Olísdeild karla fari fram í Hertzhöll Gróttu á þriðjudaginn þegar von er á Íslandsmeisturum Vals í heimsókn.