Grétar Ari Guðjónsson og félagar í Nice léku ekki gegn Besanco í frönsku B-deildinni í handknattleik í kvöld eins og til stóð vegna veikinda í herbúðum Besanco. Grétar Ari sagði við handbolta.is í dag að ekki væri á hreinu hvort um kórónuveirusmit væri að ræða eða önnur veikindi.
Forráðamenn Nice hafi samþykkt að fresta leiknum að beiðni Besanco. Hálfur mánuður er í næstu leik hjá Nice. Ekkert verður leikið í frönsku B-deildinni í næstu viku vegna landsleikjavikunnar.
„Nú förum við í fjögurra daga frí vegna pásunnar og síðan bætist við útgöngubann. Ég hef bara áhyggjur af öllum lausa tímanum sem maður hefur. Ég hef ekki tekið lengra en tveggja daga frí frá æfingum í langan tíma,“ sagði Grétar Ari við handbolta.is.
Hann sagðist þó ætla að stunda æfingar heimavið eftir bestu getu og huga einnig að einhverju sem stendur út af borðinu í rafvirkjanámi sem hann leggur stund á.
Nice-liðið hefur ekki farið vel af stað og hefur aðeins eitt stig í neðsta sæti að loknum fimm leikjum.
