ÍBV skoraði sex síðustu mörk og tryggði sér þar með sigur á portúgalska liðinu Colegio de Gaia, 27:23, í fyrri viðureign liðanna í 1. umferð Evrópubikarkeppninnar í handknattleik kvenna. Leikurinn fór fram í Gaia, í nágrenni Porto. Síðari viðureignin fer fram á sama stað á morgun klukkan 17. Samanlagður sigurvegari leikjanna tekur sæti í 2. umferð.
ÍBV komst í fyrsta sinn yfir í leiknum, 24:23, þegar fimm mínútur voru til leiksloka.Hafði liðið þá skorað þrjú mörk í röð. Fram til þess atíma var heimaliðið með yfirhöndina. M.a. var staðan 14:10 að loknum fyrri hálfleik, Colegio de Gaia. Liðið tók mikinn sprett upp úr miðjum fyrri hálfleik og breytti stöðunni úr 7:6, í 11:6. Eyjakonur létu það ekki slá sig út af laginu og voru nær allan síðari hálfleikinn að vinna upp forskotið.
Mörk ÍBV: Birna Berg Haraldsdóttir 9, Karolina Olszowa 6, Ásdís Guðmundsdóttir 5, Britney Cots 2, Elísa Elíasdóttir 2, Sunna Jónsdóttir 1, Sara Dröfn Ríkharðsdóttir 1, Birna María Unnarsdóttir 1.
Varin skot: Marta Wawrzynkowska 13, 36,1%.
