- Auglýsing -
- Guðmundur Þórður Guðmundsson og liðsmenn hans í Fredericia HK leika til úrslita um danska meistaratitilinn í handknattleik gegn Aalborg Håndbold. Fredericia HK vann Ribe-Esbjerg, 34:25, í þriðja og síðasta undanúrslitaleik liðanna í thansen-Arena í Fredericia í gær. Fredericia HK hafði mikla yfirburði í leiknum og náði mest 11 marka forskoti.
- Fyrsti úrslitaleikur Fredericia HK og Aalborg Håndbold um danska meistaratitilinn hefur einnig verið settur á dagskrá á sunnudaginn í Álaborg.
- Sebastian Frandsen markvörður Fredericia HK fór á kostum í leiknum og var með 41% hlutfallsmarkvörslu. Hann var slakur í tveimur fyrstu leikjum liðanna í undanúrslitum.
- Einar Þorsteinn Ólafsson skoraði eitt mark fyrir Fredericia HK að þessu sinni.
Ágúst Elí Björgvinsson, markvörður Ribe-Esbjerg, varði 5 skot, 26,3%, og skoraði eitt mark. Elvar Ásgeirsson skoraði ekki mark í leiknum en átti þrjár stoðsendingar.
- Ribe-Esbjerg leikur við Skjern um þriðja sætið í úrslitakeppninni. Fyrsti leikurinn verður á sunnudaginn í Skjern.
- Tryggvi Þórisson og samherjar í IK Sävehof töpuðu öðrum úrslitaleiknum við Ystads IF HF um sænska meistaratitilinn í handknattleik karla í gær, 30:26, þegar liðin mættust í Ystad. Þar með hefur hvort lið einn vinning og mætast í þriðja sinn í Partille á föstudaginn. Eftir þann leik líða fjórir dagar áður en að næsta leik kemur. Tryggvi skoraði ekki mark í leiknum í gær.
- Auglýsing -
