Afturelding heldur áfram að semja við þá ungu leikmenn sem hafa verið að spila með liðinu í vetur í Olísdeildinni. Leó Halldórsson, Ævar Smári Gunnarsson, Aron Valur Gunnlaugsson og Haukur Guðmundsson voru að skrifa undir samninga við félagið.
Fjórmenningarnir eru allir mikilvægir leikmenn í 3. flokks liði Aftureldingar sem er eitt besta liðið í þeirra aldursflokki og varð Íslandsmeistari í fyrra. Auk þess að hafa þeir allir spilað með meistaraflokki í vetur, mismikið þó.
„Þessir samningar eru mikilvægur liður í að halda áfram að vinna með þann hóp yngri leikmanna sem er hjá félaginu og koma enn fleiri leikmönnum nær því að vera í góðu hlutverki hjá Aftureldingu á næstu árum. Virkilega gaman verður að fylgjast með þeim í framhaldinu og sjá hvort að þeir geti ekki tekið stórt skref strax næsta tímabil,“ segir m.a. í tilkynningu handknattleiksdeildar Aftureldingar í dag.
