„Við erum í annarri stöðu nú en þegar við mættum íslenska landsliðinu fyrir rúmum tveimur árum en á móti kemur að það hafa líka orðið breytingar á íslenska landsliðinu eins og okkar á síðustu stundu. Við verðum að sjá til hvernig gengur en undirbúningurinn hefur ekki verið eins og best verður á kosið,“ segir Mindaugast Andriuska, landsliðsþjálfari Litháen á heimasíðu Handknattleikssambands Litháen.
Andriuska og leikmenn hans eru væntanlegir til Íslands í dag en þeir mæta íslenska landsliðinu í undankeppni EM2022 í Laugardalshöll á miðvikudagskvöld kl. 19.45.
Fjórir leikmenn úr landsliðshópnum sem Andriuska valdi á dögunum hafa helst úr lestinni á undanförnum dögum og koma þar af leiðandi ekki með til Íslands. Línumaðurinn Tadas Stankevičius, leikmaður Dicken í Litháen, er meiddur. Jonas Truchanovičius, leikmaður Montpellier, Gerdas Babarskas, liðsmaður Chambery og Benas Petreikis sem leikur með TuS N-Lübbecke er smitaðir af kórónuveirunni.
Andriuska þjálfari segist ala þá von í brjósti að Truchanovičius og Babarskas geti leikið með landsliði Litháen á sunnudaginn á heimavelli gegn Portúgal. Báðir eru þeir heima í Litháen. Petreikis er hinsvegar í einangrun í Þýskalandi.
„Staðan er erfið en við vonum það besta,“ segir Andriuska í fyrrgreindu samtali. Hann gerir sé enn vonir um að fá tvö stig út úr tveimur fyrstu leikjum undankeppninnar.
Mindaugas Dumčius, fyrrverandi leikmaður Akureyrar handboltafélags og núverandi leikmaður Elbflorenz í Leipzig, kemur beint til Íslands frá Þýskalandi þar sem hann var að leika um helgina. Dumčius segir söknuð vera af þeim leikmönnum sem verða fjarri góðu gamni, ekki síst i varnarleiknum. Í honum segir hann Truchanovičius og Babarskas leika stórt hlutverk.
