Bikarmeistarar Aftureldingar eru úr leik í Evrópubikarkeppninni í handknattleik karla eftir annað tap fyrir Tatran Presov í kvöld, 28:25, í síðari viðureign liðanna í 32-liða úrslitum. Tatran vann einnig fyrri viðureigna sem líka fór fram í Presov í Slóvakíu. 27:24.
Afturelding var marki yfir, 14:13, að loknum fyrri hálfleik í viðureigninni í kvöld. Leikmenn Tatran Presov byrjuðu síðari hálfleik á að komast yfir. Þeir voru komnir með fimm marka forskot, 23:18, um miðjan hálfleikinn. Aftureldingarmönnum tókst ekki að brúa bilið í síðari hluta hálfleiksins.
Tatran Presov varð þar með fyrsta liðið til þess að tryggja sér sæti í 16-liða úrslitum Evrópubikarkeppninnar.
Mörk Aftureldingar: Birkir Benediktsson 6, Blær Hinriksson 5, Árni Bragi Eyjólfsson 4, Þorsteinn Leó Gunnarsson 4, Ihor Kopyshynskyi 3, Jakob Aronsson 1, Leó Snær Pétursson 1, Þorvaldur Tryggvason 1.
