Díana Dögg Magnúsdóttir og samherjar hennar í BSV Sachsen Zwickau tryggðu sér í dag sæti í efstu deild þýska handknattleiksins á næstu leiktíð. Þær unnu TuS Lintfort á heimavelli, 32:27, og hafa þar með tryggt sér sigur í 2. deild þótt liðið eigi einn leik eftir. Héðan af getur hvorki Herrenberg né Füchse Berlin náð BSV Sachsen Zwickau að stigum en það er næstu tvö lið á eftir BSV Sachsen Zwickau.
Díana Dögg fór á kostum í leiknum við Lintfort. Hún skoraði sjö mörk í níu skotum, átti þrjár stoðsendingar, skapaði eitt færi, stal boltanum þrisvar sinnum og var einu sinni vísað af leikvelli. Díana Dögg var næst markahæst í sínu liði.
BSV Sachsen Zwickau var síðast í deild þeirra bestu í Þýskalandi leiktíðina 1995/1996.
Leikið var á heimavelli BSV Sachsen Zwickau í dag og hafði liðið fimm marka forskot að loknum fyrri hálfleik.
