„Sem betur fer tókst okkur að vinna upp þann mikla mun sem var á milli okkar og þeirra snemma leiks en þegar munurinn var kominn niður í eitt mark þá misstum við þær aftur framúr okkur á lokakaflanum. Það er kannski ekkert óeðlilegt af því að við vorum í eltingaleik frá upphafi. En maður er ógeðslega svekktur að þannig fór því ég hefði viljað vinna leikinn,” sagði Díana Dögg Magnúsdóttir landsliðskona sem var eins fleiri leikmenn íslenska landsliðsins vonsvikin eftir sex marka tap fyrir Slóvenum á HM í handknattleik kvenna í kvöld, 30:24.
Díana Dögg sagði að í stöðunni 19:20 hafi komið kafli þar sem gerð voru óþarfa mistök í sókninni sem hafi orðið til þess að þær stöllur misstu tökin á leiknum á nýjan leik. „Við fengum á okkur alltof mikið af einföldum mörkum á okkur í gegnum línuna og einfaldar klippingar.“
Afleit byrjun reyndist íslenska liðinu dýr þegar upp var staðið en Slóvenar voru sjö mörkum yfir, 11:4, eftir stundarfjórðung.
„Það er eiginlega magnað að okkur tókst að vinna okkur út stöðunni eins slæm og hún var. Okkur tókst að komast að einhverju leyti til baka sem er magnað vegna þess að þetta er mjög gott lið,“ sagði Díana Dögg Magnúsdóttir landsliðskona í handknattleik í samtali við handbolta.is í Stafangri í kvöld.
