Fjölnismenn lentu í kröppum dansi er þeir sóttu Kórdrengi heim í Digranes í kvöld í Grill66-deildinni í handknattleik. Kórdrengir létu sinn hlut ekki átakalaust í fyrsta heimaleiknum á Íslandsmótinu þar sem þeir undirstrikuðu að þeir verða sýnd veiði en ekki gefin. Leikmenn Fjölnis sluppu fyrir horn og mörðu út eins marks sigur, 30:29, eftir að hafa verið þremur mörkum undir að loknum fyrri hálfleik, 18:15.
Kórdrengir hafa þar með tapað tveimur fyrstu leikjum sínum í deildinni en þeir lágu fyrir Aftureldingu, ungmennaliði, í fyrstu umferð í Mosfellsbæ. Fjölnir tapaði fyrir ÍR á heimavelli í fyrstu umferð með sjö marka mun. ÍR lagði Þór í kvöld í Austurbergi eins og nánar má lesa um hér.
Stefán Sverrisson fór mikinn í liði Kórdrengja og skoraði tíu mörk. Liðið missti Eyþór Vestmann úr af með beint rautt spjald á áttundu mínútu fyrir leikbrot. Ákveðnir dómarar leiksins, Vilhelm Gauti Bergsveinsson og Ólafur Víðir Ólafsson, hikuðu ekki. Þess má til gamans geta að fáir þekkja betur fjalirnar í íþróttahúsinu í Digranesi en þeir tveir enda léku þeir um árabil með HK sem var með bækistöðvar í Digranesi um langt skeið.
Goði Ingvar Sveinsson fór fyrir Fjölnisliðinu í sóknarleiknum ásamt Aðalsteini Erni Aðalsteinssyni.
Mörk Kórdrengja: Stefán Sverrisson 10, Tómas Wemeier 6, Egill Björgvinsson 5, Þorlákur Sigurjónsson 3, Guðfinnur Þorgeirsson 3, Matthías Daðason 2.
Mörk Fjölnis: Goði Ingvar Sveinsson 7, Aðalsteinn Örn Aðalsteinsson 6, Björgvin Páll Rúnarsson 5, Þorleifur Rafn Aðalsteinsson 5, Brynjar Óli Kristjánsson 3, Óðinn Freyr Heiðmarsson 2, Ísak Örn Guðbjörnsson 1, Elvar Otri Hjálmarsson 1.
Stöðuna í Grill66-deild karla og næstu leiki er að finna hér.
