„Þetta var bara frábær úrslitaleikur í bikarkeppni. Bikarinn er allt annað en deildin. Við unnum þær um daginn í deildinni með fjögurra marka mun eftir að hafa verið undir í hálfleik. Stjarnan er bara með mjög gott lið sem erfitt er að eiga við,“ sagði Hildigunnur Einarsdóttir leikmaður nýkrýndra Poweradebikarmeistara í handknattleik kvenna eftir þriggja marka sigur á Stjörnunni í úrslitaleik í Laugardalshöll í dag, 25:22.
Vissum að þetta yrði erfitt
„Það þarf bara mjög góðan leik til þess að vinna Stjörnuna. Þær eru líkamlega sterkar,” sagði Hildigunnur og sagði ekki nokkurn leikmenn Vals hafa mætt til leiks og talið að það yrði auðvelt að vinna leikinn hvað sem öllum spádómum við kom.
„Enginn okkar reiknaði með að leikurinn yrði okkur auðveldur þótt við séum efstar í Olísdeildinni og Stjarnan í sjötta sæti. Bikarinn er alltaf bikarinn. Svona á bikarinn líka að vera. Auðvitað vildi ég að allir leikir væri auðveldir en sú er ekki raunin. Það þarf að spila þá. Þetta var frábær leikur og þegar upp er staðið þá unnum við verðskuldaðann sigur,“ sagði Hildigunnur sem er með reyndari leikmönnum Valsliðsins og hefur tekið þátt í mörgum hörkuleikjum í gegnum tíðina.
Minnugar leiksins í fyrra
Að sögn Hildigunnar höfðu hún og samherjarnir ekki gleymt úrslitaleiknum við ÍBV fyrir ári síðan þegar þær náðu ekki sínum besta leik og máttu fyrir vikið sætta sig við tap. „Við hugsuðum um bikarleikinn í fyrra og sögðum hver við aðra að það kæmi ekki til greina að þau vonbrigði endurtækju sig. Þetta var frábær liðssigur hjá okkur,” sagði Hildigunnur Einarsdóttir einn bikarmeistara Vals í handknattleik kvenna í samtali við handbolta.is í Laugardalshöll í dag.
Tengt efni:
Þetta gekk bara því miður ekki hjá okkur
Valur bikarmeistari í níunda sinn – Stjarnan veitti harða mótspyrnu
