Í framhaldi af dómi Alþjóða íþróttadómstólsins, CAS, á dögunum þar sem mildaður var dómur yfir rússneskum íþróttamönnum vegna útilokunar frá alþjóðlegri keppni hefur Alþjóða handknattleikssambandið, IHF, náð samkomulagi við Alþjóða Ólympíunefndina og Ólympíunefnd Rússlands um hvernig landslið Rússlands skuli koma fram á heimsmeistaramótinu í handknattleik karla sem fram fer í Egyptalandi í næsta mánuði.
Rússar voru dæmdir í fjögurra ára keppnisbann frá alþjóðlegri keppni eftir að upp komst um skipulagða lyfjamisnotkun rússneskra íþróttayfirvalda fyrir nokkrum árum. Bannið hefur verið mildað en á síðustu árum hafa rússneskir íþróttamenn komist framhjá banninu með ýmsum krókaleiðum, einkum í einstaklingsíþróttum. Rússneskt handknattleikslið hafa aldrei verið bendluð við lyfjamisnotkunina.
Á HM í Egyptalandi í næsta mánuði verður rússneski fáninn m.a. hvergi sjáanlegur á búningum landsliðsins. Í stað fánans verður merki rússneska handknattleikssambandsins. Einnig verður þjóðsöngur Rússlands ekki leikinn fyrir leiki liðsins á mótinu. Strangt til tekið mun landsliðið heldur ekki verða kynnt sem landslið Rússlands heldur „lið rússneska handknattleikssambandsins.“
Ekki er ljóst ennþá hvað verður leikið í stað rússneska þjóðsöngsins fyrir leiki liðs rússneska handknattleikssambandsins á mótinu. IHF og Ólympíunefnd vinna að lausn. Þrautarlendingin gæti orðið sú að einkennislag IHF verði leikið í stað þjóðsöngsins.
