Áróra Eir Pálsdóttir hefur skrifað undir nýjan tveggja ára samning við handknattleiksdeild Víkings. Áróra er línumaður sem kom til liðsins fyrir síðasta tímabil. Hún hefur staðið sig vel í ár og skoraði hún 40 mörk fyrir liðið í Grill 66-deildinni í vetur.
Áróra er einnig afar öflug í vörninni. Hún var með flestar löglegar stöðvanir hjá liðinu í vetur.
„Hún er órjúfanlegur hluti af hópnum, alltaf jákvæð og hvetjandi og gerir liðið og liðsheildina sterkari. Þessar fréttir eru mikið gleðiefni fyrir félagið og hlökkum við til að fylgjast með henni á næstu árum,“ segir í tilkynningu frá Víkingi.
Víkingar taka þátt í umspili Olísdeildar kvenna sem hefst annað kvöld. Áróra Eir og félagar mæta Gróttu í þriggja leikja rimmu. Fyrsta viðureignin fer fram í Hertzhöll Gróttu og hefst klukkan 19.30.
