Það blæs ekki byrlega hjá danska handknattleiksliðinu Ribe-Esbjerg sem þrír íslenskir handknattleiksmenn leika með. Liðið tapaði enn einum leiknum í úrvalsdeildinni í dag og virðist vera fast á meðal þriggja neðstu liðanna því hvorki hefur gengið né rekið það sem af er leiktíðar.
Að þessu sinni tapaði Ribe-Esbjerg fyrir Bjerringbro/Silkeborg, 27:22, á heimavelli eftir að hafa verið 15:8 undir í hálfleik. Upphafskaflinn gaf tóninn fyrir það sem kom á eftir en Bjerringbro/Silkeborg skoraði sex af fyrstu sjö mörkunum.
Rúnar Kárason náði sér ekki á strik að þessu sinni. Hann skoraði eitt mark í fimm skotum. Gunnar Steinn Jónsson skoraði tvö mörk og átti eina stoðsendingu eins og Rúnar. Gunnar nýtti bæði markskot sín í leiknum. Daníel Þór Ingason var að vanda í vörn liðsins en fékk ekki tækifæri í sóknarleiknum.
Sem fyrr segir þá er Ribe-Esbjerg í kjallaranum. Liðið situr í 12. sæti af 14 liðum með þrjú stig eftir 10 leiki. Lemvig með tvö stig og Ringsted með eitt eru þar fyrir neðan. Fredericia er næst fyrir ofan Ribe-Esbjerg með sex stig.
Staðan í deildinni.
