Einar Þorsteinn Ólafsson landsliðsmaður í handknattleik kveður danska úrvalsdeildarliðið Fredericia HK í sumar og gengur til lið við þýska 1. deildarliðið HSV Hamburg. Samningur Einars Þorsteins við þýska liðið er til tveggja ára. Honum er ætlað að styrkja varnarleik liðsins.
Einar Þorsteinn, sem er 23 ára gamall, lék með Val fram til ársins 2022 er hann gekk til liðs við Fredericia HK. Hann lék sinn 21. landsleik gegn Grikkjum í Laugardalshöll á síðasta laugardag. Einar Þorsteinn lék stórt hlutverk í íslensku vörninni í báðum leikjunum við Grikki á dögunum í fjarveru Elvars Arnar Jónssonar. Einar Þorsteinn var í íslenska landsliðinu á EM 2023 og á HM í janúar sl.
Þar með fetar Einar Þorsteinn í fótspor föður síns, Ólafs Stefánssonar, sem lék með Wuppertal, SC Magdeburg og Rhein-Neckar Löwen í Þýskalandi auk þess að hafa þjálfað þar í landi um skeið á síðustu árum.
HSV Hamburg er í 11. sæti af 18 liðum þýsku 1. deildarinnar 21 stig af 22 leikjum. Síðast var Íslendingur í herbúðum HSV Hamburg frá 2018 til 2020 þegar Aron Rafn Eðvarðsson stóð á milli stanganna hjá liðinu sem þá var í næst efstu deild.
Frétt á heimasíðu HSV Hamburg.
