Hátt í 300 Eyjamenn mæta

Hið minnsta verða nærri 300 stuðningsmenn ÍBV í Origohöllinni í kvöld þegar ÍBV sækir Val heim í síðari viðureign liðanna í undanúrslitum Olísdeildar karla í handknattleik. Greint var frá því á Facebook-síðu handknattleiksdeildar ÍBV skömmu fyrir hádegið að 260 miðar hafi þá þegar verið seldir til Eyjamanna samkvæmt upplýsingum frá Val.

Á síðunni segir ennfremur að enn séu nokkrir miðar eftir óseldir en hvort þeir eru það enn skal ósagt um látið þegar þessu frétt er rituð um kl. 13.30.

Allt stefnir í að góð stemning verði í Origohöllinni á leiknum en í boði er sæti í úrslitum Íslandsmótsins fyrir það lið sem heldur áfram keppni. Valur vann fyrri viðureignina með þriggja marka mun, 28:25.

Flautað verður til leiks klukkan 20 í Origohöllinni.