- Auglýsing -
- Daníel Þór Ingason og Oddur Gretarsson skoruðu fjögur mörk hvor fyrir Balingen-Weilstetten í gærkvöld þegar liðið sótti HC Motor heim til Düsseldorf og vann með þriggja marka mun, 26:23. Daníel Þór átti einnig eina stoðsendingu. Balingen-Weilstetten er í efsta sæti sem fyrr. Liðið hefur unnið sér inn 40 stig í 24 leikjum. HC Motor er í 17. sæti af 20 liðum með 15 stig. Roland Eradze er aðstoðarþjálfari HC Motor og starfar þar við hlið Savukynas Gintaras fyrrverandi leikmanni Aftureldingar.
- Örn Vésteinsson Östenberg skoraði þrjú mörk og átti eina stoðsendingu þegar lið hans, Tus N-Lübbecke, vann Ludwigshafen, 33:25, á heimavelli í þýsku 2. deildinni í gærkvöld. N-Lübbecke skaut upp í annað sæti deildarinnar með stigin sín 35 eftir 24 leiki. Eisenach er næst á eftir með 34 stig og á leik til góða.
- Grétar Ari Guðjónsson varði 11 skot, þar af eitt vítakast, 34,3%, á heimavelli í gær þegar lið hans, Sélestat, tapaði fyrir US Ivry í botnslag frönsku 1. deildarinnar í handknattleik, 32:30. Fyrir viðureignina voru liðin í tveimur neðstu sætunum en þau tóku sæti í efstu deild í upphafi keppnistímabilsins. Sélestat er ennþá neðst með sex stig eftir 19 leiki. US Ivry fór upp fyrir Istres og er nú í þriðja neðsta sæti með 10 stig.
- Ungverska landsliðið í handknattleik kvenna, sem mætir Íslandi í umspili um HM sæti í næsta mánuði, tapaði fyrir þýska landsliðinu, 26:20, á móti í Ludwigsburg í Þýskalandi í gær. Ungverjar mæta Pólverjum á mótinu í dag. Þýska liðið var mikið sterkara í leiknum í gær og náði m.a. níu marka forskoti, 23:14, þegar rétt innan við tíu mínútur voru til leiksloka.
- Ungverska meistaraliðið í karlaflokki í handknattleik, Pick Szeged, er sagt hafa boðið IK Sävehof 100.000 evrur, jafnvirði 15 milljóna króna, til að kaupa þjálfarann Michael Apelgren undan samningi. Aftonbladet sagði frá þessu í gær samkvæmt heimildum. Forráðamenn Pick Szeged leita logandi ljósi að eftirmanni Spánverjans Juan Carlos Pastor sem hættir þjálfun liðsins í vor eftir áratug í starfi.
- Apelgren er einn nokkurra þjálfara sem er nefndur sem hugsanlegur þjálfari íslenska landsliðsins í handknattleik karla.
- Dananum Lars Walther var í gær vikið úr starfi þjálfara Eurofarm Pelister í Norður Makedóníu. Eurofarm Pelister komst ekki í 16-liða úrslit Evrópudeildarinnar í handknattleik og mátti Walter súpa af því seyðið þrátt fyrir starfssamning fram á mitt næsta ár. Walter lék með KA hér á landi um tveggja ára skeið um aldamótin.
- Auglýsing -
