- Auglýsing -
- Orri Freyr Þorkelsson skoraði tvö mörk í stórsigri Sporting á liðsmönnum Madeira, 41:29, á heimavelli í portúgölsku 1. deildinni í handknattleik í gær. Með sigrinum fór Sporting upp að hlið Porto í efsta sæti deildarinnar eftir 19 umferðir.
- Aron Pálmarsson kom lítið við sögu þegar Veszprém vann Balatonfüredi með 23 marka mun, 47:24, á heimavelli í ungversku 1. deildinni í handknattleik í gær. Veszprem og Pick Szeged eru efst og jöfn í deildinni með 28 stig efti 15 leiki. Szeged lék í fyrradag.
- Bjarki Már Elísson var ekki með Veszprém. Hann hefur ekki jafnað sig af meiðslum í hné.
- Þriðji Hafnfirðingurinn í upptalningunni, Grétar Ari Guðjónsson, varði 4 skot, 20%, þann tíma sem hann var í marki US Ivry þegar liðið tapaði fyrir Chambéry á útivelli, 35:25, í frönsku 1. deildinni í handknattleik í gær. US Ivry rekur lestina í deildinni með þrjú stig eftir 16 leiki.
- Tjörvi Týr Gíslason skoraði eitt mark fyrir Bergischer HC í sex marka sigri á HSC 2000 Coburg, 32:26, í þýsku 2. deildinni í handknattleik í gær. Arnór Viðarsson skoraði ekki mark fyrir Bergischer HC í leiknum. Arnór Þór Gunnarsson er þjálfari Bergischer HC sem er í efsta sæti deildarinnar með 28 stig eftir 19 leiki. Minden, Balingen og Hüttenberg eru þremur stigum á eftir og eiga auk þess leik til góða.
- Auglýsing -
