Aron Pálmarsson hefur ekki lengi verið í herbúðum danska úrvalsdeildarliðsins Aalborg en hann hefur þegar unnið fyrsta verðlaunagripinn með nýja liðinu. Aalborg vann í kvöld meistarakeppnina í Danmörku þegar meistarar og bikarmeistarar síðasta tímabils mættust. Aalborg er ríkjandi meistari en Mors Thy er bikarmeistari eftir fremur óvæntan sigur á Álaborgarliðinu í úrslitaleik í vor.
Aron og félagar unnu viðureignina í kvöld afar örugglega, 33:25, eftir að hafa verið marki yfir að loknum fyrri hálfleik. Liðsmenn Mors Thy náðu að standa í meisturunum í fyrri hálfleik og vera yfir framan af. Leiðir skildu í síðari hálfleik. Arnór Atlason er aðstoðarþjálari Aalborg.
Aron fór á kostum í leiknum. Hann skoraði eitt mark en átti margar stoðsendingar, m.a. þá sem sjá má á myndskeiðininu hér fyrir neðan.
Keppni í dönsku úrvalsdeildinni hefst eftir viku en Aron og félagar í Aalborg sækja Svein Jóhannsson og félaga í SönderjyskE heim fimmtudaginn 2. september.
