Óvissa ríkir um hvenær landsliðskonan Arna Sif Pálsdóttir getur byrjað að leika af fullum krafti með Val. Hún hefur lengi átt í erfiðum meiðslum á hné og gengið illa að fá fullan bara.
„Ég virtist vera búin að ná mér þarna rétt fyrir covid en svo blússaði þetta allt upp þegar maður fór að æfa úti og ég þurfti að fara aftur á byrjunarreit,“ sagði Arna Sif þegar handbolti.is heyrði í henni hljóðið.
„Ég er aðeins byrjuð að geta verið með á æfingum að einhverju leyti svo biðin styttist. En það er bara alltof stutt í að deildin fari af stað,“ sagði Arna Sif sem var talsvert frá keppni á síðasta keppnistímabili vegna meiðsla.
Arna Sif, sem er næst leikjahæsta landsliðskona Íslands frá upphafi, flutti heim fyrir rúmu ári eftir að hafa verið atvinnukona í handknattleik í Danmörku, Frakklandi og í Ungverjalandi um árabil.
