„Því miður þá misstum við sænska liðið alltof langt frá okkur þegar á leið síðari hálfleikinn,“ sagði Thea Imani Sturludóttir leikmaður íslenska landsliðsins í handknattleik í samtali við handbolta.is eftir 13 marka tap, 37:24, fyrir sænska landsliðinu í fyrri viðureign liðanna í undankeppni Evrópumótsins í handknattleik á Ásvöllum í gærkvöld.
„Sænska landsliðið er afar vel samæft og refsar miskunnarlaust fyrir hver mistök sem andstæðingurinn gerir. Ef okkur tókst ekki að skora eða ljúka sóknum á almennilegan hátt þá var okkur harkalega refsað.
Við verðum að vanda mikið betur sendingar okkar á milli. Það kemur þegar við leikum oftar og meira saman. Að þessu sinni komu inn nýir leikmenn og aðrar voru í meiri hlutverkum en áður. Það er gott að fá fleiri inni í hópinn okkar, nokkuð sem styrkir okkur til framtíðar,“ sagði Thea Imani Sturludóttir landsliðskona að loknum 75. landsleik sínum á Ásvöllum í gær.
Íslenska landsliðið fór til Svíþjóðar í morgun og leikur öðru sinni við sænska landsliðið í Karlskrona á laugardaginn klukkan 13.
Staðan í 7. riðli undankeppni EM:
| Svíþjóð | 3 | 3 | 0 | 0 | 113:61 | 6 |
| Ísland | 3 | 2 | 0 | 1 | 84:74 | 4 |
| Færeyjar | 3 | 1 | 0 | 2 | 77:81 | 2 |
| Lúxemborg | 3 | 0 | 0 | 3 | 47:105 | 0 |
Fyrsti landsleikurinn – fyrsta markið, myndir
Óþarflega stórt tap á Ásvöllum – myndir
EM kvenna ’24: Úrslit og staðan – 3. umferð
