Úlfur Gunnar Kjartansson gengur til liðs við Hauka í sumar frá ÍR. Greint fer frá félagaskiptum hans á Facebook-síðu í ÍR í kvöld og þar segir að Haukar og ÍR og hafi náð samkomulagi um kaup Hauka á Úlfi Gunnari sem gerir um leið þriggja ára samning við Hauka.
Úlfur Gunnar er línumaður en er einnig sterkur varnarmaður sem lætur til sín taka. Forráðamenn Hauka hafa einmitt verið að leita að manni í bæði hlutverk í stað Heimis Óla Heimissonar sem er hættur og Gunnars Dans Hlynssonar sem óvíst er hvað tekur sér fyrir hendur.
Úlfur sem er 25 ára byrjaði að leika með Þrótti en skipti síðan yfir til ÍR hvar hann hefur verið síðustu ár að undanskildu keppnistímabilinu 2021/2022 þegar ÍR-ingar voru í Grill 66-deildinni.
Þar með hafa þrír leikmenn sem léku með ÍR á síðasta keppnistímabili leitað á ný mið eftir að liðið féll úr Olísdeildinni. Auk Úlfs Gunnars eru það Dagur Sverrir Kristjánsson og Viktor Sigurðsson. Dagur Sverrir samdi við Karlskrona en Viktor gekk til liðs við Val.
Haukar hafa einnig tilkynnt um komu Úlfs Gunnars á Ásvelli.
~ Úlfur Gunnar Kjartansson til Hauka ~
— Haukar – Handbolti (@Haukarhandbolti) June 14, 2023
Línumaðurinn Úlfur Gunnar Kjartansson gengur til liðs við Hauka frá ÍR. Úlfur sem er 25 ára línumaður og jafnframt sterkur varnarmaður hefur gert þriggja ára samning við Hauka. pic.twitter.com/iE3F2ipnWK
