Handknattleiksmaðurinn Viktor Sigurðsson hefur skrifað undir þriggja ára samning við Val, Viktor, sem er 21 árs gamall, kemur til Vals frá ÍR þar sem hann lék upp yngri flokka og upp í meistaraflokk. Viktor varð fjórði markahæsti leikmaður Olísdeildarinnar á leiktíðinni með 127 mörk í 22 leikjum.
Handbolti.is sagði frá því á dögunum að Viktor á leiðinni til Vals.
„Viktor er gríðarlega efnilegur og hefur vakið mikla athygli í Olísdeildinni. Við höfum fylgst með honum lengi enda með spennandi eiginleika sem leikmaður sem verður gaman að vinna með. Hann mun passa vel við okkar leikstíl og ekki skemmir fyrir að þetta er góður drengur sem talað er vel um upp í Breiðholti,“ er m.a haft eftir Snorra Steini Guðjónssyni þjálfara Vals í tilkynningu handknattleiksdeildar Vals í dag.
