„Við erum á leiðinni í allt öðruvísi leik gegn Færeyingum en á móti Lúxemborg á miðvikudaginn. Nú verður um mjög krefjandi leik að ræða fyrir okkur,” segir Sandra Erlingsdóttir landsliðskona í handknattleik í samtali við handbolta.is um væntanlega viðureign íslenska landsliðsins gegn færeyska landsliðinu í undankeppni Evrópumótsins í handknattleik kvenna í Þórshöfn í dag. Flautað verður til leiks í Höllinni á Hálsi klukkan 14 að íslenskum tíma
„Að þessu sinni mun klisjan um sterkan varnarleik vera í fullu gildi. Við verðum að vinna mjög vel í vörninni til þess að stöðva færeyska liðið. Það hefur á að skipa góðum leikmönnum, Suna Hansen, Jana Mittún og Maria Nólsoy. Þær eru sterkar maður á mann, mjög snöggar og fljótar,” sagði Sandra.
Spurð hvort sækja verði framarlega gegn færeysku leikmönnunum svaraði Sandra að finna þurfi milliveginn. Ekki megi mæta þeim færeysku of framarlega til þess að línumaðurinn fari þá ekki að leika lausum hala. Einnig megi ekki standa of aftarlega, þá er voðinn vís gegn snöggum andstæðingum.
Sandra segir sóknarleik íslenska liðsins verða sífellt öruggari. Hún segir hann ekki verða vandamál gangi allt eðlilega fyrir sig.
„Við erum bara orðnar spenntar að mæta í leikinn. Ég reikna með ótrúlega skemmtilegum leik og frábærri stemningu,” sagði Sandra Erlingsdóttir landsliðskona í handknattleik í samtali við handbolta.is.
Viðureign Íslands og Færeyja hefst klukkan 14 í dag að íslenskum tíma.
