- Auglýsing -
ÍBV og Haukar eigast við í undanúrslitum Powerade-bikars karla í handknattleik í Laugardalshöll í kvöld. Flautað verður til leiks klukkan 18.00.
- ÍBV hefur átta sinnum komist í undanúrslit bikarkeppninnar í karlaflokki. Fyrst árið 1990. ÍBV mætti Víkingi og tapaði 29:26.
- Sjö árum áður, 1983, komst Þór, annar forveri ÍBV, í undanúrslit bikarkeppninnar fyrst liða frá Vestmannaeyjum. Þórarar töpuðu fyrir Víkingi, 26:20.
- Þór Vestmannaeyjum var annað liðið utan höfuðborgarsvæðis til að ná sæti í undanúrslitum bikarkeppninnar í karlaflokki. KA braut ísinn fyrir landsbyggðaliðin árið 1980.
- Síðast lék ÍBV í undanúrslitum mars 2020 og vann Hauka í hörkuleik í Laugardalshöll, 27:26.
- Haukar hafa 20 sinnum leikið í undanúrslitum bikarkeppninnar. Fyrsti undanúrslitaleikurinn var árið 1975, árið eftir að bikarkeppninni var komið á fót. Haukar töpuðu fyrir FH, 23:20, í undanúrslitaleiknum fyrir 49 árum.
- Haukar unnu Fram í undanúrslitum fyrir ári, 28:19.
- Stjarnan og Valur mætast í síðari undanúrslitaleik Powerade-bikarsins í Laugardalshöll í kvöld. Leikurinn hefst klukkan 20.15.
- Stjarnan hefur fram til leiksins í kvöld átt fimmtán sinnum lið í undanúrslitum. Í fyrsta skiptið komst lið Stjörnunnar svona langt í keppninni 1984, fyrir 40 árum. Stjarnan lagði þá Val, 21:19, og lék þar með til úrslita.
- Stjarnan komst sex sinnum í undanúrslit á sjö ára tímabili frá og með 1984 til og með 1990.
- Síðast komst Stjarnan í undanúrslit fyrir ári en tapaði fyrir Aftureldingu, 35:26.
- Valur hefur oftast allra liða náð í undanúrslit bikarkeppninnar í karlaflokki. Leikurinn í kvöld er sá 32. hjá karlaliði Vals í undanúrslitum keppninnar frá 1974. Valur vann FH í undanúrslitum 1974 eftir framlengdan leik, 27:25. Jafnt var eftir 60 mínútur, 22:22.
- Valur var síðast í undanúrslitum bikarkeppninnar vorið 2022 og lagði þá FH, 37:27, á Ásvöllum þar sem leikið var til undanúrslita og úrslita meðan viðgerðir stóðu yfir í Laugardalshöll.
- Auglýsing -
