Óðinn Þór Ríkharðsson lék eins og sá sem valdið hefur í kvöld í fyrsta deildarleik sínum með Kadetten Schaffhausen í svissnesku 1. deildinni í handknattleik. Hann skoraði 10 mörk úr 12 skotum á heimavelli þegar Kadetten vann TSV St. Otmar St. Gallen, 38:33.
Óðinn Þór kom til Kadetten í sumar en varð svo óheppin að ristarbrotna nokkrum dögum áður en keppnistímabilið hófst. Hann var í fyrsta sinn í leikmannahópi Kadetten á þriðjudaginn í Evrópudeildinni gegn Montepellier en kom lítið við sögu í leiknum. Hann lét hinsvegar hendur standa fram úr ermum í kvöld, tók hreinlega til óspilltra málanna, Aðalsteini Eyjólfssyni þjálfara og öðrum Kadettenliðum til gleði.
Ólafur skoraði 12 sinnum
Ólafur Andrés Guðmundsson sparaði svo sannarlega heldur ekki púðrið í kvöld í leik með liðinu sínu GC Zürich. Hann skoraði 12 mörk, tvö úr vítaköstum, á heimavelli í jafntefli, 30:30, HSC Kreuzlingen. Ólafur Andrés átti 16 markskot.
Kadetten er efst í deildinni með 20 stig að loknum 12 leikjum. Krienz-Luzern og Pfadi Winterthur er langt á eftir auk þess sem bæði lið eru tveimur leikjum á eftir meisturunum. GC Zürich er í fjórða sæti.
