„Þetta var erfiður leikur fyrir okkar. Álaborgarliðið var vel undirbúið og hafði góðar lausnir gegn okkar sóknarleik. Við vorum frá upphafi í vandræðum með framliggjandi varnarleik þeirra,“ sagði Ómar Ingi Magnússon leikmaður Magdeburg í samtali við handbolta.is í Lanxess-Arena í Köln í dag eftir að Magdeburg tapaði fyrir Aalborg Håndbold í undanúrslitaleik Meistaradeildar Evrópu í handknattleik karla. Magdeburg leikur um bronsverðlaunin á morgun gegn annað hvort THW Kiel eða Barcelona sem eigast við á eftir í hinni viðureign undanúrslita.
Berjast fyrir hverju marki
„Við náðum að sama skapi ekki upp hraðaupphlaupum og þurftum að berjast fyrir hverju marki. Í lokin munaði bara nokkrum atriðum,“ sagði Ómar Ingi sem var skiljanlega vonsvikinn með niðurstöðuna enda var það skýrt markmið þýsku meistaranna að leika til úrslita og helst að vinna annað árið í röð.
Gríðarlega svekkjandi
„Varnarleikur og markvarsla helst í hendur. Á þeim atriðum féllum við í dag. Okkur tókst aldrei að komast í rytma. Því fór sem fór. Niðurstaðan er gríðarlega svekkjandi,“ sagði Ómar Ingi Magnússon niðurlútur þegar handbolti.is náði af honum tali að loknum undanúrslitaleiknum í dag. Hann var markahæstur hjá Magdeburg með 10 mörk.
Undanúrslitaleikur Magdeburg hefst klukkan 13 á morgun að íslenskum tíma.
Sjá einnig:
