Þrjár sem skipa landsliðshópinn í handknattleik sem tekur þátt í Evrópumótinu í handknattleik í Austurríki, Sviss og Ungverjalandi undir lok þessa mánaðar voru með íslenska landsliðinu á EM 2010 í Danmörku og tveimur árum síðar, 2012 þegar EM fór fram í Serbíu. Síðan hefur íslenska landsliðið ekki náð inn í lokakeppni EM fyrr en nú.
Ísland leikur í F-riðli í Innsbruck í Austurríki. Fyrsti leikur Íslands á EM verður föstudaginn 29. nóvember kl. 17 gegn hollenska landsliðinu. Tveimur dögum síðar leikur íslenska landsliðið við Úkraínu og aftur líða tveir dagar þegar röðin kemur að viðureign við þýska landsliðið. Tveir síðustu leikirnir hefjast klukkan 19.30.
Sjá einnig: Fimm breytingar frá HM hópnum fyrir ári
Rut Arnfjörð Jónsdóttir tók þátt í báðum mótum og hefur leikið samanlagt sex landsleiki í lokakeppni EM og skorað 17 mörk.
Sunna Jónsdóttir lék leikina þrjá á EM 2010 og skoraði tvö mörk.
Þórey Rósa Stefánsdóttir var í landsliðinu á EM 2012 og tók þátt í leikjunum þremur og skoraði sjö mörk.
- Handbolti.is verður vitanlega á EM, án ríkisaðstoðar, og fer utan með blaðamann og ljósmyndara sem fylgja landsliðinu eftir meðan það stendur í ströngu.
Sjá einnig: Alltaf er erfitt að skilja einhverjar eftir
| A-riðill – Debrecen: | B-riðill – Debrecen: |
| Svíþjóð | Svartfjallaland |
| Ungverjaland | Rúmenía |
| N-Makedónía | Serbía |
| Tyrkland | Tékkland |
| C-riðill – Basel: | D-riðill – Basel: |
| Frakkland | Danmörk |
| Spánn | Sviss |
| Pólland | Króatía |
| Portúgal | Færeyjar |
| E-riðill – Innsbruck: | F-riðill – Innsbruck: |
| Noregur | Holland |
| Austurríki | Þýskaland |
| Slóvenía | Ísland |
| Slóvakía | Úkraína |
- Riðlakeppnin verður leikin í Debrecen í Ungverjalandi, Basel í Sviss og Innsbruck í Austurríki.
- Tvö lið halda áfram úr hverjum riðli yfir milliriðla. Tvö neðstu liðin falla úr leik.
- Milliriðlar verða leiknir í Debrecen og Vínarborg.
- Færeyjar og Tyrkland taka í fyrsta sinn þátt
- Úrslitahelgi EM fer fram í Vínarborg.
- EM hefst 28. nóvember og lýkur með úrslitaleik 15. desember.
A-landsliðs kvenna – fréttasíða.
