„Þetta var bara geggjað, allt fyrir áhorfendur, sveiflur og síðan alvöru spenna í lokin. Ég held að áhorfendur hafi fengið allt fyrir peninginn,“ sagði Birgir Steinn Jónsson leikmaður Aftureldingar glaður í bragði í samtali við handbolta.is eftir sigur Aftureldingar á Val, 28:25, í fyrstu viðureign liðanna í undanúrslitum Olísdeildar karla í handknattleik að Varmá í kvöld.
„Svona á stemningin að vera í úrslitakeppninni. Troðfull stúka og brjáluð stemning. Eftir þessu hefur maður beðið allt árið. Þegar ég skrifaði undir samning við Aftureldingu í fyrravor í miðri úrslitakeppni þá dreymdi mann meðal annars um að spila fyrir framan rauða hafið, stuðningsmannasveitina rothöggið,“ sagði Birgir Steinn sem skoraði sjö mörk í leiknum og var næst markahæstur Aftureldingarmanna.
„Það er bara geggjað að hafa alla Mosfellinga á bak við sig. Ég vona að það verði alvöru stemning á næsta leik,“ sagði Birgir Steinn.
„Það var frábært að enda veturinn svona og taka á móti sumrinu,” sagði Birgir Steinn Jónsson en lengra viðtali er við hann á myndskeiðinu hér fyrir ofan.
Olís karla: Leikjadagskrá, úrslitakeppni
