„Varnarleikur og hraðaupphlaup gengu vel hjá okkur í dag,“ sagði Óskar Bjarni Óskarsson þjálfari Vals í samtali við handbolta.is í dag eftir að Valur vann Granitas-Karys öðru sinni í fyrstu umferð Evrópubikarkeppninnar í handknattleik karla, 33:28. Báðir leikir fór fram í Litáen og vann Valur í gær með þriggja marka mun, 27:24.
„Við vorum sjálfum okkur verstir í fyrri leiknum í gær. Fórum þá með sex eða sjö dauðafæri og hefðum átt að vinna með mun meiri mun, sex eða sjö marka mun. Lentum þess í stað í barningi.
Í dag nýttum við aftur á móti færin vel og hlupum mjög mikið. Við hefðum getað unnið með meiri mun en heilt yfir var þetta faglegt og gott hjá okkur,“ sagði Óskar Bjarni ennfremur.
Margir leggja í púkkið
„Við nýttum breiddina í leikmannahópnum mjög vel í báðum leikjum enda erum við með mjög jafnan og góðan hóp leikmanna. Margir leggja í púkkið sem er jákvætt,“ sagði Óskar Bjarni Óskarsson þjálfari Vals.
Valur mætir Pölva Serveti frá Eistlandi í annarri umferð, 32-liða úrslitum Evrópubikarkeppninnar, eftir mánuð, væntanlega 14. og 21. október.
